زينب راحت تنام

زين العابدين فؤاد

 

زينب تكمل سفرها

يتلف توبها بغبارها

تحكى حكاية لقمرها

" أنا بيتى فى بلاد بعيدة

هارجع وبهدوم جديدة"

تتعب، وتفرش تنام

لا كف يمسح شعورها

ولا هديل لحمام

زينب، بتفرش تنام

 

نامت طوابق عليها

نام الغبار والركام

تقل الجبال ع العضام

 

الأم تبعت نَفَسها

بوسة فى تلج الإيدين

" روحى يا زينب بعيد

روحى عليكى السلام

روحى لست المقام

أخت الحسن والحسين

من دم ورد الشهيد

زرعت عناقيد كلام

طرحت رموش كل عين

روحى يازينب بعيد

روحى لست المقام "

 

 

قبل النزول للتراب

قبل الطلوع للسحاب

وقف البراق اللى شالها

دمَّع وردِّد سؤالها 

مين فيكو يقدر ينام

مين فينا يقدر ينام

 زينب راحت تنام

 

زين العابدين فؤاد

31/7/2006

زينب 4 سنوات

عروسة من قانا