إليكم مجموعة أشعار فى الزمن الحار

إلهامي الميرغني

29 يونيو 2005

الفترة الجاية لسوهارتو

الفترة الجاية لسوهارتو
حتى ولو ..متوا.. أو إنهارتوا
الحاكم هو ومين غيرة
مين يملك ف الحكم مهارته
الفترة الجاية لسوهارتو
***
الفترة الجاية دى مضمونة
والفترة التالية دى مأمونة
مين انتوا عشان تنتخبونا
وتقولوا بدلتوا وغيرتوا
الفترة الجاية لسوهارتو
***
متنيل في جميع خطواتة
وتاريخى ف جميع خطاباتة
والشعر المنتوف .. من باطة
أطيب م العنبر .. لطهارتة
الفترة الجاية .. لسوهارتو
***
متأنى ... مش لجل غبائه
بالعكس..ده معروف بدهائه
ونزاهته هو وابنائه
معروفة وحتى ان شهرتوا
الفترة الجاية لسوهارتو
***
إزاى حنفرط وجلالته
قاعد علشان ينهى رسالته
ولغاية متشوفوا ريالته
وتكونوا كشعب إتحضرتوا
الفترة الجاية لسوهارتو

جمال بخيت

 

أصل الجراد أشكال وألوان

يا معلقين ع المراجيح والحبل مستورد فاخر
ليلتنا فاتت زي الريح...ما هي كل حاجة وليها آخر
بس الحقيقة المذهلة ان الجميع في السلسلة
وفوق الرقاب يا معلمين...أحبال قطيفة مدلدلة

أصل الخواجة ابن ماريكا لما بيدخل حواريكا
يا إما ياخدك في بطاطه يا إما يا ابني هيأذيكا
حاكم الخواجة ابن ماريكا هو اللي بدع الشيكابيكا
تدخل قفاه عايز تلعب حيرقصك سامبا وسيكا

افتح عيونك فنجلجل
لكل من جه يتحنجل
أصل الجراد أشكال وألوان
حاطط على الأخضر بيحش
وبألف ماركة وألف دراع
وكل يوم بيبدل وش

يا ابن العرب ياللا يا ويكا اعرف بقى مين أعاديكا
ده أنت إذا كفوفك ضمّت ما حد يقدر يساويكا

افتح عيونك فنجلجل
لكل من جه يتحنجل
أصل الجراد أشكال وألوان
حاطط على الأخضر بيحش
وبألف ماركة وألف دراع
وكل يوم بيبدل وش

أشعار حمدي عيد

يا مـصـري

يا مصري ليه دنياك لخابيط و الغلب محيط
والعنكبوت عشش ع الحيط وسرح ع الغيط
يا مصري قوم هش الوطاويط ... كفاياك تبليط
صعبة الحياة والحل بسيط ... حبة تخطيط
فتحت باب استيرادك
وصرفت فوق ضعف إيرادك
حِلي للخواجة استكرادك
سابك بتقرا في أورادك
وده قشّطك ونزل تشفيط
يا مصري ليه دنياك لخابيط والغلب محيط
والعنكبوت عشش ع الحيط وسرح ع الغيط
ومهولاتي تحب تزيط
ساعة الفرح زغاريد تنطيط
وفي المياتم هات يا صويت
وفي المظاهرات سخن تشيط
و في الانتخاب تنسى التصويت
يا مصري ليه دنياك لخابيط والغلب محيط
والعنكبوت عشش ع الحيط وسرح ع الغيط
وليه بترشي وتتساهل
وتضيع حقوقك بالساهل
تستاهل النار تستاهل
يا غويط ويحسبك الجاهل
سهل وساهي وغبي وعبيط
يا مصري ليه دنياك لخابيط و الغلب محيط
و العنكبوت عشش ع الحيط و سرح ع الغيط
يا مصري يا للي الغلا عاصرك
والنهب في عصرك حاصدك
قوم للحياة واسبق عصرك
ولا حاجة هترجع مصرك
إلا ان تكون شغال ونشيط
يا مصري ليه دنياك لخابيط والغلب محيط
والعنكبوت عشش ع الحيط وسرح ع الغيط
يا مصري قوم هش الوطاويط ... كفياك تبليط
صعبة الحياة والحل بسيط ... حبة تخطيط

شعر سيد حجاب

 

من نحن - انضم إلينا - فهرس المصادر - الإصدارات - التقارير - آداب وفنون